لو عندك ملعب نجيل صناعي او ترتان او بتفكرتعمل ملعب نجيل صناعى او ترتان او اكريليك او حتى حمرا !
هنتكلم انهاردة عن دراسة لمشروع انشاء ملعب نجيل صناعي او ترتان بصور كاملة ومفصلة 😊
نركز شوية في الكلمتين دول هما مش كتير بس علشان اللي عمل ملعب نجيل صناعي او ترتان وفشل يحاول يقوم واللي ناوي يعمل ملع بيستفاد من اخطاء الناس اللي سبقته .
الكلمتين اللي جايين دول لو فهمتهم كمل لتحت لو مفهمتش انزل برضو يمكن تفهم والعيب يكون عندنا 😃
انت هتعمل ملعب نجيل صناعي او ملعب ترتان اواكريليك او حمرا , المطلوب منك شوية حاجات كدة اساسية تتحط في الحسبان
1 – العمر الافتراضي للملعب 5 سنين والضمان بيكون 8 سنين ( يعني هتحسب مكسبك خلال ال 5 سنين والباقى كمالة )
2 – اللي فشل في مشروع الملعب قبل كدة كان بسبب انه مش دارس المشروع لانه غيره نجح كتير ( سواء فشل اداري او سوء اختيار مكان وميعاد عمل المشروع وده هنتكلم فيه بالتفصيل تحت )
3 – الفلوس اللي هتدفعها كدة كدة هترجعلك ان شاء الله سواء عملت ملعب غالي او عملت الملعب بالرخيص 😊
4 – وانت بتفكر ف المشروع لو مش بتفهم في الكورة هات حد يقعد معاك يفهمك الدنيا بتمشي ازاي في الملاعب لان معظم الناس اللي فشلت مكنتش فاهمة ملاعب الكورة بتشتغل ازاي ( ادي العيش لخبازه )
5 – علشان تعمل ملعب بتحتاج شوية حاجات كدة اللي احنا بنسميها خطوات انشاء الملعب ( اختيار الارض , الاعمال المدنية , اعمال الحدادة والاعمدة , اعمال الكهربا والممارسة او الديزل , ثم اعمال النجيل الصناعي, الافتتاح , الافتتاح , الافتتاح ركز ها ركز كدة في الكلام )
كدة انت عندك نظرة كاملة عن المشروع هات كوباية الشاي بقى وتعالى اقرأ التقيل اللي جاي علشان محتاج تكون فايق ^_^
نبدأها كدة بالارض واختيارها ونوعها .
علشان تعمل ملعب نجيل صناعي او ملعب ترتان اواكريليك او ملعب حمرا المفروض انك تختار الارض في مكان كويس وتكون على الاقل منطقة مفيش فيها ملاعب كتير علشان تقدر تجيب زبون ليك وكمان المفروض انك تعرف المقاسات القانونية للملاعب ودي المقاسات القانونية للملاعب
ابعاد ملعب النجيل الصناعي الخماسي
المساحة الاولي وهي المساحة القانونية الدولية : 22 * 42 مترمربع
المساحة الثانية وهي المساحة القانونية المصرية : 18 * 38 مترمربع
المساحة الثالثة وهي متوسط المساحة : 20 * 40 متر مربع وبتتغير مساحة ملاعب النجيل الصناعي فى مصر على حسب رغبة العميل او على حسب مساحة الارض المتاحة وابعاد ملعب النجيل الصناعي الخماسي تعتبر هي الابعاد المناسبة للملاعب فى مصرلانها بتساعد على الاستثمار وبتساعد برضو على تنمية الرياضة فى مصر
ابعاد ملعب النجيل الصناعي السداسي
المساحة الاولي وهي مساحة الملعب القانوني الدولي السدادسي : 27 * 47 متر مربع
المساحة الثانية وهي مساحة الملعب القانوني المصري : 24 * 44 مترمربع
المساحة الثالثة وهي متوسط المساحة : 25 * 45 متر مربع
ابعاد ملعب النجيل الصناعي السباعي
المساحة الاولي وهي مساحة الملعب القانوني الدولي السباعي : 35 * 55 متر مربع
المساحة الثانية وهي مساحة الملعب القانوني المصري : 30 * 50 مترمربع
المساحة الثالثة وهي متوسط مساحة الملعب السباعي : 33 * 53 متر مربع
كدة عرفنا المقاسات تعالى نشوف الارض بيحصل فيها ايه :
الارض بيتعمل ليها تحديد للمقاسات وده بيكون عن طريق مهندس مدني بينزل وبيحدد ابعاد الملعب وبعد كدة بتكون مرحلة بداية الاعمال المدنية , من غير ما نتوغل في الاعمال المدنية فهي بتكون عبارة عن وضع دقشوم ورمل حلواني وبيتم عملية دك ليهم بطريقة معينة عن طريق متخصصين طبعا في الهندسة المدنية وبعد كدة بيتم زرع اعمدة الحدادة وابراج الكهرباء وبيتم تركيب الكشافات والتوصيلات الخاصة بالكهرباء بدون التوصيل للتيار الرئيسي وبتكون الارض كدة جاهزة علشان يتحط عليها النجيل الصناعي .. كدة عندنا فكرة حتى لو مختصرة عن الارضية واللي بيتم فيها.
قبل ما ندخل في النقطة اللي بعدها عندنا كذا ملحوظة :
1- الارض لو زراعية مش بيحصل ليها تبوير ,بالعكس انت لو عاوز بعد 5 سنين تشيل الملعب وتزرع مفيهاش مشاكل لان الارض مش بتتبور وده شيئ ناس كتير بتكون خايفة منه ده غير انها بيحصل مشاكل مع الزراعة بسبب الموضوع ده .
2 – اعمال الكهرباء ليها كذا نوع , مثلا في عميل بيحب يعمل كشافات ” ليد ” ودي احدث حاجة وبتوفر في حاجات كتير وفي ناس بتحب تعمل الميتا لايت العادية اللي بتشتغل باللمبة والبادئ والترانس كل واحد ليه عيوبه ومميزات واسعاره , حاجة تانية في اعمال الكهرباء وهي التيار الرئيسي .. عندك حل من اتنين اما انك تعمل ممارسة في شركة الكهرباء او انك تجيب مولد كهرباء “ديزيل ” وبرضو كل اختيار ليه عيوبه ومميزاته لكن دي مش مشكله لانها بسيطة لما تقرر تعمل ممارسة او تشتري ديزيل هتعرف الفرق وتختار اللي يريحك يعني .
3 – الشبك ليه كذا نوع سواء شبك قطن او حرير او بوليستر , اواختيار تاني خالص وهو الشبك المجلفن اللي بيكون عبارة عن باكيات حديد وفيها شبك حديد عبارة بتكون اقل في الارتفاع لكن اشد صلابة .
كدة خلصنا قصة الارض والاعمال المدنية والحدادة والكهرباء والشبك .
النجيل الصناعي بقى ومحتوياته ومشتملاته :
بص ياسيدي الفاضل انت قدامك اختيارات اما انك تعمل ملعب نجيل صناعي او ملعب نجيل طبيعي او ملعب ترتان او ملعب اكريليك او ملعب حمرا
قدامك تختار اي نوع من انواع الملاعب كله علي حسب مواصفاته واسعاره تعالى نعرف كدة نبذه عن كل نوع
النجيل الطبيعي : عيوبه الملعب بيشتغل اوقات معينة بس يعني مثلا ممكن يتلعب عليه 10 ساعات في الاسبوع بس , الصيانة مكلفة جداااا وهتكون محتاج انك تتعاقد مع ناس بتوع صيانة ملاعب يكونوا ثابتين في الملعب علشان اي حاجة تحصل في الارض تتعالج في نفس الوقت , ده غير الري والتقليم والتخطيط وكمان الحشرات والمبيدات ده غير ان عمره الأفتراضي مش كبير , لكن مميزات النجيل الطبيعي انه مش غالي لكن دي مش ميزة قوي للناس المستثمرين لانه هيلاقي نفسه بيدفع كتير للصيانة ومش بيكسب برضو , الميزة التانية انه ناس كتير بتحب تلعب على الطبيعي لانه طبياً افضل ليهم لكن في بديل طبي طبعا طلع لكن هنتكلم عنه في النقط اللي جاية
النجيل الصناعي : عيوبه الملعب محتاج اهتمام شوية لانه مينفعش تسيبه سنة او اتنين من غير اي صيانة وتيجي تفكر تعمل صيانة لان الملعب هيكون اتبهدل ولو عملت صيانة هتكون مكلفة وبالتالي العمر الافتراضي بتاع الملعب بقي اقل , تاني حاجة في العيوب انه محتاج انك تعمل ملعب على القياسات القانونية للفيفا يعني مش هتجيب نجيل صناعي وتحط فيه رمل ورابر وهات ناس تركب ونزل الناس تلعب , المفروض انه فيه مواصفات قياسية وقانونية للملعب يتعمل علي اساسه علشان تتفادي موضوع الاصابات الطبية زي المية على الركبة والاصابات اللي بتحصل بسبب التاكلينج مثلا او العنف في الملعب .. لكن المميزات بقى اللي هتلاقيها في النجيل الصناعي انه انت تكاليفه مش عالية قوي , كمان الملعب متاح يتلعب عليه اي عدد ساعات يعني لو شغال 24 ساعة ف الاسبوع مفيش اي مشاكل , والملعب مش هتكون شاي لهم التنظيف لانه سهل ده غير انه مش بيحتاج انه يترش بالمية وكمان الوقت الخاص بإنشاء الملعب مش كبير ده غير العمر الأفتراضي الخاص بالملعب بيكون 5 سنوات فما اكثر وكمان مش متغير مع عوامل الجو سواء صيف او شتاء .
الترتان والاكريليك : الاستخدام الاول والاساسي لملاعب الترتان هي لعمل الملاعب المتعددة مثل كرة الطائرة وملاعب التنس وهكذا , ويندرج تحت هذه الملاعب تخطيط ملاعب كرة القدم لانه يمكن اللعب على هذه الملاعب كل انواع الرياضات المرتبطة بالجري وحركة القدم واليد , ناس كتير بترجع انها تعمل ملاعب الترتان فضلا عن النجيل الصناعي او الطبيعي نظرا لان الترتان والاكريليك عمره الافتراضي اعلى ودي ميزة مهمة لملاعب الترتان ان عمرها الافتراضي عالي جدا بالاضافة انه مش بيحتاج صيانة غير التخطيط كل سنة على الاقل , وتعتبر ملاعب الترتان والاكريليك اعلى انواع الملاعب سعر سواء للمستثمر او للاعبين
خلصنا كدة طريقة انشاء ملاعب النجيل الصناعي وانواعها تعالوا نتكلم شوية عن الاسعار اللي الناس كلها بتخاف منها .
بالنسبة للأسعار فهي مش هينفع تتحدد الا وقت التنفيذ للمشروع لكن دلوقتى متوسط اسعار النجيل الصناعي بتبدأ من 145 جنيه فما فوق والاسعار متغيرة يوميا بسبب ان سعر الدولار مش ثابت سواء بالايجاب او بالسلب , والاسعار دي خاصة بالنجيل الصناعي التركي , هتلاقي انواع نجيل صناعي كتير منها مصري وهتلاقي سعودي وهتلاقي هندي وبلجيكي وهتلاقي بلاد الله الواسعة كلها بتطلع نجيل صناعي لكن احنا بنقولك الافضل انك تتعامل بالنجيل الصناعي التركي او الاسباني او الايطالي لانه فيه كل المواصفات اللي قلناها فوق دي بالاضافة ان الفيفا معتمدة الثلاث بلاد دول فقط كتصنيف عالمي لمنتجات النجيل الصناعي والمفروض ان النجيل الصناعي بيكون معاه داتا شيت لكل تفاصيله ومواصفاته ده غير الضمان والعمر الافتراضي .
متوسط سعر الملعب الخماسي في الربع الاخير من عام 2016 وحتى الربع الاول من عام 2017 هو 200 الف جنيه .
بتختلف التكلفة نظرا لنوع النجيل الصناعي ,نوع الاعمال المدنية والحدادة والكهرباء والشبك .
طيب ازاي تكسب من الملعب وارباحه شكلها عاملة ازاي ؟
سعر تأجير الملعب فى الساعات الصباحية مابين 80 الي 100 جنيه
سعر تأجير الملعب فى الساعات المسائية ما بين 100 الى 120جنيه
احنا هنعمل راسة الارباح على اقل شيئ : هنحسب الساعات الصباحية 80 جنيه والمسائية ب 100 جنيه
متوسط الحجز صباحا 4 ساعات ومتوسط الحجز ليلا 4 ساعات وده اقل شيئ
المكسب اليومي من الساعات الصباحية : 320 جنيه
المكسب اليومي من الساعات المسائية : 400 جنيه
اجمال المكسب اليومي الصباحي والمسائي : 720 جنيه
ملحوظة : هنخصم 20 جنيه يوميا مرتب عامل النظافة
اذن الربح اليومي للملعب : 700 جنيه
ويتحول صافي الربح شهريا الي : 21 الف جنيه على اقل تقدير لعدد الساعات والتكلفة
بعد السنة الاولي يتحول صافي الربح الخاص بيك الي : حوالى 252 الف جنيه
طيب لو خلينا عدد الساعات 5 وخلينا السعر العادي 100 صباحا و 120 مساءا ؟؟ احسبها انت بقى 😃
طيب واحد هيسأل والمصاريف اللي بنقعد ندفعها في الكهرباء والعمال والصيانة والكور !! هنجيبها منين ؟
انت قدامك حاجات كتير جدااااا تجيب منها فلوس :
1 – مدارس الكورة
2 – حجوزات مدارس الكرة والعاب القوة مثل الكاراتيه والكونج فو ,الخ
3 – الكافيتيريا الخاصة بالملعب
4 – طاولة بلياردوا وبينج
5 – غرفة للالعاب الالكترونية مثل البلاي ستيشن وما الي ذلك
الحاجات دي كلها ممكن تغطي ليك كل مصاريف الملعب وكمان هتدخلك صافي ربح سنوي ما لايقل عن 50 الف جنيه 😊
دلوقتى انت عملت ملعب متوسط سعر 200 – 220 الف جنيه وخلال اول سنة رجعت راس المال ومعاك كمان ربح وبعد اول سنة هتقعد 4 سنين بتجمع ارباح صافية للمشروع 😉
كدة انت اكيد معاك فكرة شاملة للمشروع .. حبة نقط هنقولك عليهم علشان متقعش زي الناس اللي بتقع اليومين دول 😊
1 – اختيار ألارض مهم جدا جدا جدا اختار مكان صح
2 – اختار شركة تنفذ الملعب صح متجريش ورااللي بيبيع بسعر كويس يناسب احتياجك , خلال عام 2016 اتعمل احلال وتجديد لأكتر من 100 ملعب بسبب ان النجيلة بتبوظ بعد اول سنة , وده علشان الناس بتجري ورا النجيل المصري او السعودة او بالبلدي بتجري ورا الارخص وبالتالي بيخسر راس المال والربح بتاعه انت بتعمل مشروع استثماري دور على الحاجة اللي تكسبك اكتر وتعيش وقت اكتر .
3 – اسعار المواد الخام , ممكن ابيع ليك نجيل صناعي ب 150 جنيه وشركة تبيع ليك نفس النوع ب 145 !! طيب ايه الفرق بقي ؟
الفرق انه ممكن يكون الملعب بيحتاج 3 طن رابروهو ينزل ليك 2 طن رابر , وبالتالي هو وفر حوالي 3 الاف جنيه وانت اللي هتخسر ده غير انه ممكن ميكونش منزل ليك لاصق ورابر بتوع المصنع نفسه .. فأنت لازم تتأكد من كل ده لان الشركات بتلعب على انه يديلك سعر ارخص بس انت متعرفش هو هيركب الملعب ازاي 😊
4 – الصيانة ثم الصيانة ثم الصيانة , اهتم جدا ان الملعب يتعمله صيانة ربع سنوية على الاقل يعني كل 3 شهور اطلب من الشركة المنفذة تعمل ليك صيانة كل 3 شهور علشان الملعب ميحصلش فيه اي مشاكل , الشركات كلها لما بتصدق تسلم ملعب علشان تدخل في ملعب غيره وغيره وغيره لكن خليك انت مهتم ان كل 3 شهور اتواصل مع الشركة اطلب الصيانة بتاعتك ومفيش حد معصوم من الاخطاء الادارية لكن المفروض انك ليك حق لازم تاخده .
واخيرا دي دراسة شاملة للمشروع يارب تكون مفيدة لكل شخص حابب يعمل ملعب وتابعونا هنعمل ملف كامل لدراسة جدوى كاملة للملعب وازاي تعرف تدرس السوق او المنطقة بتاعتك وتعرف هل هي مناسبة لعمل ملعب ولا لا وممكن تسيب الايميل بتاعك في كومنت واحنا هنبعتلك الدراسة .
شركة بيبا سبورت لتجهيز ملاعب النجيل الصناعي بتقدم خصم 10 الاف جنيه على كل انواع ملاعب النجيل الصناعي والترتان وكمان اول سنة صيانة مجانية من الشركة علشان نضمن جودة المنتج اللي انت اشريته .
المصدر
Recent Comments